( عوض أحمد خليفه ) جنرال القلوب وعراب الجمال ..وعشرة الأيام

الطيب عبد الماجد

حرب ( الحب ) وإشتباك ( المشاعر )….وإسناد ( الشعور ) يقودها الجنرال ( عوض أحمد خليفه ) جنرال القلوب وعراب الجمال …..

( لا عارفين نرفع التمام ولا نحي الغمام ) 🙏

فعوض أحمد خليفه موهوب بالفطرة …متدفق بالتخصص رقيق بالإحساس …!!
ولعاب …!!

نثر فينا الورد والأشواق….وضيعني ساكن المورده …
التى أنجبته ومنحته رضاها …فتقدم ببزته العسكريه أخضر وقلبو أخضر …☘️

توارت ( البنادق ) …وأطلت الحدائق 💐

تم تجريده من رتبته العسكريه وهو ( يوزباشي )
نقيب بثلاث ( نجمات ) لإتهامه بالمشاركة في إنقلاب فاشل ولم يكن الرجل يعلم أنه على موعد مع كل النجوم

فقد كتب (عوض أحمد خليفه ) أجمل الأشعار وكل الحكايه وتمت إعادته للخدمة من جديد فتدرج حتى وصل رتبة ( اللواء )
ووصل إلي إحساسنا والشعور …
عوض دا كتب ( عشرة الأيام ) لعثمان حسين
ولو إكتفى بها لكفتنا …..
🎼
وعشرة الأيام ما بصح تنساها
كأنو ما حبيتك وكأنو ما عشناها
وضمانا أحلى غرام
🎼
فأصبحت تميمة المعذبين وندماء الغرام ….وأنيسة المحبين …!!
يتامى الحب …وأسرى الهيام 🥰
لعب مع عثمان حسين (ضاغط ) فأردفها ب ( صدقيني )
🎼
وصدقيني وحياة غرامنا.. ما كذبت عليك في حبي
🎼
ليلتقيان في ( ربيع الدنيا ) لقاء القمة
( عوض ) تجلى ….و ( عثمان ) تدفق …والذواقة (طشو )

فكانت واحدة من الأغنيات السودانية الملهمة
🎼
وأنا فيك عشقت الروعه ما ما أحلاها فى الدل والدلال
والمعاني الراسمة نور إشراقه في عينيك ظلال
ومن قلبى من أجل المحبه وهبت ليك شعر الغزل
مع إنو قدامى الطريق أنا عارفو يالسمحة إنقفل
ومافى قسمه ….يانور قلبى حتى بصيص أمل
ما قدرت أقرب من ضراك وماقدرت لى فراقك أصل

ونحن هسا البوصلنا شنو ….!!😳
( ماشفتو عوض يا ساري الليل ) ..؟؟؟

ليؤكد ( خليفه ) علو كعبه في الساحة الغنائيه
ويلعب مع ( عثمان حسين ) و( إبراهيم عوض ) و ( أبو داوؤد) و ( زيدان إبراهيم ) وأبوعركي البخيت )
و ( كابلي )
( شوف ليك منتخب )
( دي ( ميسي ) ما عملا )
وقدله يا مولاي حافي حالق

التقي مع ( الذري ) في ( غاية الآمال ) بكلمات رقيقه
وبوح نبيل …( فخصبوا اليورانيوم ) ..🙌
و ( إبراهيم عوض ) إذا دندن ( بملاك ) وإذا تفنن ( عزاك )
وإذا تسلطن ..( بوديك بهناك ) ….
فما بالك بهذا المدد والإسناد والذخيره الحيه
من قائد سلاح ( الأمنيات ) اللواء ( عوض أحمد خليفه )
عراب ( النضم ) وسيد الحروف ….
🎼
ويا غاية الآمال
لو دعاك الشوق
ماكان جفيتنا زمان

وكانت أغنية بطعم الحب والأشواق وهي مربعات
يحلق فيها ( إبراهيم عوض ) كيفما شاء …
قام بتلحينها ( حاوي ) الألحان ( عبد اللطيف خضر ) …
الذي غالبا” ما يتفوق على نفسه …!

( وود الحاوي حاوي )
ياخ دا لحن ( المصير ) …..!!
تاني إلا يطير …!!

وكانت غاية الآمال…محطة دعاش …وكل الجمال ….

( ود الحاوي ) لحن ( دا ماسلامك ) للمرهف
( مجذوب أونسه )
( أطيب فنان سوداني ) ……………🥰 وغناي …

كتبها ( النورس ) عزمي أحمد خليل ..
( بجيهو صاد بالحيل ) …
🎼
ودا ما سلامك
ولا الكلام الكان زمان هسع كلامك
ولا يعني نويت تسيبنا
🎼
( شوف السودان دا حنين كيف ) ….!!🥰

( خليفه ) جدد من في قصيدة الغناء السوداني
وقد جمع بين بساطة الكلمه …وعمق المفرده .وصدق المشاعر ….وطعم الغنا

والتقي مع ( كابلي ) لقاء المحبين ….
و ( كابلي ) دا كان لاقيتو ساكت في الشارع فأنت سعيد
فما بالك بلقاء العيد بين طرفي هذا العقد النضيد

وكانت أغلي من عينيا وأحلى من إبتسامي
أغنية ( ندية ) تعكس روح ( عوض )،المتوهجة …وتؤكد إستعداد ( كابلي ) المبذول
🎼
ومكتوب فى جبينى
غرامك وإنت عارفو

وكتب ( عوض )
( ماخلاص نسيتنا وخليتنا )
أغنية تقطر شهد ….وتتأوه عتاب ..وتتنزل ودموع
وبتشبه ( كابلي ) 🥰

وخليناك كمان…
ودعنا حلو الماضي…أفراحو…
كل الكان وكان…!
🎼
( شوف الناس دي كانت بتقول في شنو )
( دا level عالي )

وكابلي دا لو غنى أي حاجه …يضفي عليها جمال
فمابلك عندما يلتقي ( الجنرال )

ياخ ( كابلي ) غنى مبروك عليك الليله يانعومه
في ( مباراة وديه ) وداها السما
فإرتقت ( نعومه ) من ( دلوكة ) البنات لي ( بدلة ) كابلي
لاعرفت ترقص ولا عرفت تميل ….
ولسان حالها يقول دا عرس ولا تخريج ….

وعلشانك إنت البتتحمل أذانا…
ترحل بي جسمك وخاطرك معانا ….!!
💃 ومبروك عليك الليله يانعومه …!!

وغنا ( البنات ) في السودان يوثق ويشرح وينقل
صادق وعفوي ومعبر ….
و ( لذيذ )

البروف ( عبدالله الطيب شخصياً …وفي إحدى قفشاته المحضورة …
وفي سؤال مباغت عن سر زواجه ب ( خواجيه )
رد ( ممازحاً ) وفي خروج نادر عن النص
( الريد قِسَمْ يا عينيا )
( فمنحها الشرعيه ) 🙌

( تكون الحروف بترجف لي هسا )
ودي لما ( يقولا ) البروف ….أسهمها بتمشي ( وول ستريت )
‏( Wall Street )

هسا ( نعومه ) دي دي نبارك ليها العرس …..ولا كابلي …

بلد ..زي البلد ياخ 🥰
إلا القسمه …
( السودان دا حتى لو مرقت منو …ما بمرق منك ..) 🥰
( وهذا سره )
وعوض من هذا النسيج ……!!

ليجمع ( الجنرال )كل قواته ويرابط على حدود ( العندليب ) المحصنة بالجمال ويدخلها ( غنوة )

ويلتقي مع ( زيدان إبراهيم) في الهواء الطلق عبر روائع
هبشت الشعب السوداني كلو …
🎼
ومن لمسات حنانك خلاص تمينا دور
أيام مره خاليه من طعم السرور
كل ماغني شادي ذوبني الشعور

وقد إرتقت به هذه الأغنيه لمصاف فناني الدرجة الأولي كما تصنفهم الإذاعه وقتها …
فالكلمات جديده ولافته واللحن ( غير ) للرقيق ( الفاتح كسلاوي )

و ( كسلاوى ) ملحن مبدع ومهم وعبقري ظلمته الدنيا ولم تنصفه الأيام …

لحن ( ولو جارت عليك أيام..تعال لعيونا بتشيلك ) 😍
للمختلف ( إبراهيم حسين )
وعينيا ما تبكي لي ( ترباس ) …

( غناها ( الحوت ) فبكت مرتين )
🎼

ولا هو البحن ليّا ..ولا الزمن بيرحم
عينيا ما تبكي..
🎼
( كسلاوي ) لحن ( ليه كل العذاب ) لزيدان ..
والعذب ( التجاني حاج موسى ) وغيرها من النواضر
ياخ دا لحن ( بتقولي لا ) لعبد العزيز المبارك ..
يلحن شنو تاني ….

والتقي ( عوض ) مع ( زيدان ) أيضًا في ( بالي مشغول …ياحبيبي )
وجاب من ( جوه ) ( الحريف ) ….
إحتفى بها الناس ..🙏 وزيدان غناها بمزاج ….
ولحن ( ملكي ) لود الحاوي …
🎼
وليك أعود والقاك متين
وقلبي زايد في حنينو
أصلو قلبي عليك حنين

وأبو الزيك ( مصنف ) …
سكب من روحه في الغناء حتى تخاله يناجي نفسه والروح …!!
ولذلك وصلتنا أغنياته صادقة ونضرة تلامس الوجدان ….وتدغدغ المشاعر …وتهبش العصب فتداعى فى حضرة ( الخليفه ) ….!!🙏

ليواصل شاعرنا تجلياته ويلتقي مع ( القديس ) ( عركي ) تحت ضوء القمر ….

( ولو كنت ناكر الهوى زيك كنت غفرت ليك ) 😍

( السيمفونية السودانيه السابعه )

والتقي أبو عركي مع شعراء كثر كل بطعمه ومذاقه
ليقطف من الزهور والنجوم ويقدم للناس
الذين عشقهم ( عركي ) ….
فبادله الناس الوفاء والحب

ولقاء مترف مع عوض أحمد خليفه على شرفات المدينه

ومع كل دفقاتى الحنينه وكل دمعة شوق سجينه..
تهاتي بيك روحى الحزينه وأشقى لما تهاتى بيك..

( كسرة يا عوض ) 🙌

( هسا دي بلد حرب ) ….!!؟؟

والتقي مع ( سيد القهوه ) ( عبد العزيز محمد داوؤد)
في ( أغلي الحبايب ) وقيل ( أحلى)

و ( أبو داوود ) دا لو ما ( مذاكر ) ماتقابلو
والجنرال ( تقيل ) ….فكانت أغنية من الزمن الجميل

ويا أحلى الحبايب ويا حبي النبيل
كيف تنساهو ريدك وحبك لي قبيل
يلوموني العوازل يقولو حبيبو ولى
وما تسال عليهو مادام ريدو قلا
تذليل الحبايب في شرع الحب مذلة
وليه تبكي الليالي وقلبك يصير عليل

( دا فتوح ) ♣️♥️

( عوض أحمد خليفه ) شاعر وقع إسمه في دفتر ( الحبور )
فكان مشرقاً وبهياً وناصعاً ….ولا مست كلماته القلب وشغاف النفوس …!!
موهوب ومتألق ومجدد ….
إجتماعي وظريف ووناس …

وسوداني …😍

نطلق في هذه اللحظات ( إحدى وعشرين ) ( عصفورة )
في الهواء ….تحية لمرور هذا الملهم وتعظيم سلام

( وأنا فيك عشقت الروعه ما أحلاها في الدل والدلال )

صحي يا جنرال. ..!!
………..

ولا يعني نويت تسيبنا ….!!!!
🌹